FH tókst ekki að ná í þrjú stig á Kaplakrikavelli í kvöld er liðið fékk Keflavík í heimsókn í Pepsi-deild karla.
Keflvíkingar komust tvisvar yfir í leik kvöldsins en í bæði skiptin svaraði FH í leik sem lauk með 2-2 jafntefli.
Hér má sjá það góða og slæma úr leiknum.
Plús:
Það er þungu fargi létt af Geoffrey Castillion framherja FH sem skoraði sitt fyrsta mark fyrir félagið. Leikur hans hefur verið slakur en eftir markið fékk hann mikið sjálfstraust.
Spilamennska Keflavíkur í fyrri hálfleik var góð, það besta sem liðið hefur náð að sýna í sumar.
Skipting Ólafs Kristjánssonar í síðari hálfleik var heldur betur góð. Jónatan Ingi lagði upp á Atla Guðnason aðeins tveimur mínútum eftir að Ólafur sendi þá á völlinn.
Stig í Garðabæ og í Hafnafirði fyrir Keflavík er frábært en nú þarf liðið að fara að sækja sigra gegn slakari liðum deildarinnar.
Mínus:
Sindri Kristinn Ólafsson markvörður Keflavíkur var afar óöruggur í sínum aðgerðum, úthlaupin voru illa tímasett.
Pétur Guðmundsson hefði líklega átt að stöðva leikinn þegar Eddie Gomes varnarmaður FH virtist fá höfuðhögg. Pétur stoppaði ekki leikinn og Keflavík brunaði og skoraði fyrsta mark leiksins með Eddie liggjandi á vellinum.
Það er slakt hjá FH að geta ekki unnið slakasta lið Pepsi deildarinnar hingað til á heimavelli. Toppsætið í boði en FH tók það ekki.