Ólafur Kristjánsson, þjálfari FH, var fúll með það að nota ekki tækifæri kvöldsins á að komast á toppinn í Pepsi-deild karla.
FH gerði 2-2 jafntefli við botnlið Keflavíkur en FH lenti tvisvar undir í leiknum en svaraði í bæði skiptin.
,,Ég er hundfúll með það,“ sagði Óli um að FH hafi ekki nýtt tækifærið í annað skiptið að komast á topp deildarinnar.
,,Það var góður möguleiki, heimavöllur og við höfum spilað ágætlega en það er þreytt að nýta ekki færin og svo gefum við þeim mörk.“
,,Það er bara þannig í fótbolta að þú er dæmdur á úrslitunum og nú eru úrslitin hjá okkur ekki nógu góð. Við getum ekki skýlt okkur á bakvið spilamennsku.“
Keflavík skoraði fyrra mark sitt er Eddi Gomes lá í grasinu og var Óli óánægður með að dómari leiksins hafi ekki stöðvað lleikinn.
,,Ef ég byrja á að taka það þá fer Einar Orri klárlega í höfuðið á Eddi Gomes og hann liggur eftir.“
,,Það hefur verið stöðvað leiki hægri, vinstri útaf hinum og þessum höfuðmeiðslum og alls konar meiðslum. Það sem við klikkum á að gera er að halda ekki fókus.“
,,Ég er mjög ósáttur með að Pétur hafi ekki stöðvað leikinn þegar Gomes liggur. Það var farið í höfuðið á honum.“