Leikjum í riðlakeppni í A-riðli á HM er lokið en báðir leikirnir fóru fram á sama tíma.
Úrúgvæ tryggði sér sigur í riðlinum með sigri á Rússum en bæði lið voru með fullt hús stiga fyrir leikinn.
Úrúgvæ vann 3-0 sigur en Luis Suarez skoraði fyrra markið og Denis Cheryshev setti svo boltann í eigið net. Edinson Cavani gulltryggði svo sigur í uppbótartíma.
Í hinum leiknum var að litlu að keppa en þar mættust stigalausu liðin Sádí Arabía og Egyptaland.
Leiknum lauk með 2-1 sigri Sádí Arabíu en Mohamed Salah skoraði sitt 50 mark á tímabilinu í leiknum.