Nabil Fekir, leikmaður Lyon í Frakklandi, gæti enn verið á förum frá félaginu í sumarglugganum.

Fekir var á leið til Liverpool áður en HM í Rússlandi hófst en þau félagaskipti fóru ekki í gegn á endanum.

Jean-Michel Aulas, forseti Lyon, hefur nú staðfest það að leikmaðurinn gæti samt sem áður yfirgefið félagið.

,,Hlutirnir eru aldrei alveg búnir í fótboltaheiminum. Ég er persónulega ekki lengur í viðræðum við Liverpool og við bíðum bara eftir að Nabil og Frakkland eigi frábært HM,“ sagði Aulas.

,,Umboðsmaður hans, Jean-Pierre Bernes er í hæsta gæðaflokki og það er óþarfi að hafa áhyggjur.“

,,Ég tel að Nabil myndi bæta sig enn frekar ef hann verður áfram hér en ég ræð því ekki.“