Hörður Snævar Jónsson skrifar frá Volgograd:
Heimir Hallgrímsson landsliðsþjálfari segir ólíklegt að Jóhann Berg Guðmundsson komi til með að spila gegn Nígeríu á morgun. Þessi mikilvægi leikmaður varð fyrir meiðslum í síðari hálfleik gegn Argentínu og þurfti að fara af leikvelli.
Meiðslin eru ekki alvarleg en þó þess eðlis að ólíklegt er að hann komi við sögu á morgun.
Ef lesa má í orð Heimis gæti hann gert meira en bara eina breytingu á hópi sínum.
,,Það verða örugglega einhverjar breytingar, það var í huganum fyrir mótið. Ég ætla ekkert að gefa upp hversu margar þær verða,“ sagði Heimir.
Margir hafa velt því fyrir sér hvort Heimir far í tvo framherja í þessum leik og noti þá Jón Daða Böðvarsson og Alfreð Finnbogason saman.