Guðmundur Kristjánsson, leikmaður FH, var svekktur í kvöld eftir 2-1 tap gegn Val í stórleik í Pepsi-deild karla.

FH-ingar voru einfaldlega klaufar í leiknum segir Guðmundur og segir að eitthvað þurfi að laga í spilamennsku liðsins.

,,Það er rétt, þetta var svekkjandi tap. Við náðum ágætis spili inn á milli og fengum nokkur færi en það vantar herslumuninn,“ sagði Guðmundur við Stöð 2 Sport eftir leikinn.

,,Við gerðum fjögur jafntefli í röð og erum ekki að nýta færin. Við náum ekki að skapa nóg þó þau hafi verið nokkur. Svo fáum við á okkur klaufaleg mörk og leyfum þeim að skora tvö og þá verður þetta erfitt.“

,,Fyrsta markið þeirra kemur eftir langt innkast, okkar maður flikkar boltanum og svo annar sem flikkar þegar ég er að fara í árás á boltann og Pedersen stendur þarna einn og skorar. Ég veit ekki hvort þetta sé heppni eða bara óheppilegt.„