Stjarnan er komið á toppinn í Pepsi-deild karla en liðið mætti ÍBV í fyrsta leik 10. umferðar í kvöld.

Baldur Sigurðsson reyndist hetja Stjörnunnar í leik kvöldsins en hann skoraði sigurmark liðsins í 2-1 sigri í Garðabænum eftir hornspyrnu.

Hér má sjá það góða og slæma úr leiknum.

Plús:

Bæði lið voru eiginlega ekki upp á sitt besta sem skapaði góðan fótboltaleik. Það hljómar undarlega en það virkaði þannig á mann.

Shahab Zahedi skoraði geggjað mark fyrir ÍBV í dag. Fór illa með Daníel Laxdal og þrumaði svo boltanum undir Harald Björnsson og í netið.

Fyrra mark Stjörnumanna var ekki verra. Þorsteinn Már skoraði eftir frábæra hælspyrnu Guðjóns Baldvinssonar en sóknin í heild sinni var frábær.

Stemningin var fín í stúkunni, HM er í gangi en menn létu sig ekki vanta á völlinn.

Fjalar Þorgeirsson, markmannsþjálfari Stjörnunnar fékk gult spjald í dag. Það var ansi skondið. Öskraði á Ívar dómara og fékk refsingu.

Mínus:

Ég ætlaði að kalla þetta klúður hjá Stjörnunni ef þetta hefði endað í jafntefli. Þeir fengu svo góð færi í þessum leik og áttu að skora miklu fleiri mörk.

Sölvi Snær Fodilsson kom inná sem varamaður hjá Stjörnunni í dag í sínum fyrsta leik í sumar. Það tók strákinn eina mínútu að fá gult spjald fyrir dýfu frá Ívari dómara! Sá dómur var þó held ég bara kolrangur og átti Stjarnan að fá vítaspyrnu.

Eyjamenn gáfu bara eftir í síðari hálfleik. Leyfðu Stjörnumönnum að keyra á sig sem skapar ekkert nema vandræði.