Danny Rose, leikmaður Englands, segir að tapið gegn Íslandi á EM 2016 hafi hjálpað liðinu í undirbúning fyrir HM í Rússlandi.

England tapaði 2-1 fyrir Íslandi á EM í Frakklandi en Rose segir að undirbúningur liðsins fyrir þann leik hafi verið allt öðruvísi en hvernig liðið æfir sig í dag.

,,Ég get bara talað um EM og það sem er að gerast núna,“ sagði Rose við blaðamenn í dag.

,,Það hefði verið gott að undirbúa okkur öðruvísi á EM og þá sérstaklega fyrir leikinn gegn Íslandi.“

,,Það sem við gerðum á æfingum fyrir þann leik tengdist því ekkert hvernig Ísland spilaði í leiknum.“

,,Ég get sagt það núna að við erum að æfa okkur fyrir hvernig Túnis spilar og það sem við höfum séð á upptöku.“