Það fór fram stórleikur í vesturbænum í kvöld er lið KR fékk FH í heimsókn í lokaleik áttundu umferðar Pepsi-deildar karla.
KR tók forystuna snemma leiks með marki Kennie Chopart áður en Steven Lennon jafnaði metin fyrir FH með stórkostlegu marki í síðari hálfleik.
Það var svo danski framherjinn Andre Bjerregaard sem kom KR yfir í uppbótartíma eftir flotta skyndisókn og staðan orðin 2-1.
Forystan entist í aðeins eina mínútu en Atli Guðnason jafnaði svo strax fyrir FH í uppbótartímanum og lokastaðan 2-2!
Hér má sjá það góða og slæma úr leiknum.
Plús:
Steven Lennon er svo ótrúlegur leikmaður. Jöfnunarmark hans í dag var stórkostlegt. Þrumaði boltanum viðstöðulaust af löngu fyrir sem fór yfir Beiti í markinu. Mögulega mark sumarsins komið!
Eddi Gomes er virkilega góður leikmaður. Ég spyr mig, væri ekki hægt að nota hann frammi? Ótrúlegt power þegar hann kemst á ferðina og hann tapar ekki skallabolta. Væri flottur sem target man í þessari deild.
Mætingin var ansi góð á KR vellinum í kvöld og var mikið öskrað og kvartað. Gaman að sjá smá passion úr stúkunni.
Björgvin Stefánsson stóð sig með prýði í dag og nefni ég sérstaklega vinnusemi drengsins. Hljóp eins og brjálæðingur allan leikinn.
Þvílíkur lokakafli! Tvö mörk í uppbótartíma en KR-ingar misstu algjörlega hausinn eftir að hafa komist yfir og FH jafnaði strax.
Mínus:
FH-ingar voru vægast sagt slakir í byrjun leiks. KR var á undan í alla bolta og gestirnir voru í miklum vandræðum. Heppnir að fá ekki annað mark á sig í byrjun.
Gunnar Nielsen var mjög óöruggur í fyrri hálfleik í marki FH. Ákvað á meðal annars að fara í mjög heimskulegt úthlaup og var stálheppinn að KR hafi ekki bætt við.
Enn eitt jafnteflið niðurstaðan hjá þessum liðum. Fjórða jafntefli FH í röð á meðan KR hefur gert þrjú jafntefli í síðustu fimm leikjum.
Þóroddur dómari meiddist í leiknum í dag, þurfti að fara af velli þegar um korter var eftir, ekki á hverjum degi sem maður sér það. Skipti sjálfum sér útaf fyrir Arnar Þór Stefánsson sem kláraði leikinn.
FH átti að fá vítaspyrnu í uppbótartíma. Albert Watson setti einfaldlega hendina í boltann sem var á leið inn í miðjan vítateig KR en ekkert dæmt. Rán.