Stjarnan þurfti að sætta sig við eitt stig í Pepsi-deild karla í kvöld er liðið fékk Grindavík í heimsókn.
Leiknum lauk með 1-1 jafntefli en heimamenn hefðu klárlega átt að skora meira og fengu færin til þess.
Hér má sjá það góða og slæma úr leiknum.
Plús:
Stjörnumenn spiluðu fínan sóknarleik í dag og spiluðu í raun betur en þeir hafa gert oft í sumar.
Grindavík fær plús fyrir baráttuanda og vilja til þess að næla í stig. Ætluðu ekki að fara tómhentir heim.
Maciej Majewski, markvörður Grindavík, átti stórleik. Leysti Kristijan Jajalo af hólmi og stóð svo sannarlega fyrir sínu.
Mínus:
Hvernig í ÓSKÖPUNUM skoraði Stjarnan ekki fleiri mörk í leiknum? Fengu endalaust af færum til þess að skora. Ótrúlegt.
Sito, framherji Grindavíkur, hefði getað bætt við er hann fékk dauðafæri einn gegn Haraldi í stöðunni 1-0 en tókst ekki að skora. Hefði getað skipt sköpum.
Ég held að Stjarnan hafi fengið 15 hornspyrnur í leiknum. Þurfa að nýta þær betur, það er á hreinu.
Milan Stefán Jankovic fékk rautt spjald á bekknum hjá Grindavík. Sparkaði í vatnsbrúsa á hliðarlínunni og var rekinn upp í stúku. Aðeins að róa sig.
Þrátt fyrir að hafa verið mikið betri í leiknum þá voru Stjörnumenn líka heppnir að fá ekki á sig annað mark. Grindvíkingar hefðu getað stolið þessu. Sofandaháttur í vörninni.