,,Fiðringurinn er að aukast, það er alltaf sama spenna þegar maður hittir strákana. Sólin skín á okkur, þetta eru einhver skilaboð,“ sagði ALfreð Finnbogason framherji Augsburg og íslenska landsliðsins.

Alfreð var einn af þeim leikmönnum sem kom saman við liðið í dag og æfði af krafti.

Framherjinn knái var meiddur framan af ári en lék síðustu leikina með Augsburg í Þýskalandi og er vongóður fyrir framhaldið.

,,Auðvitað er alltaf erfitt að komast til baka eftir margra mánaða fjarveru, ég fann það. Mér gekk mjög vel í fyrstu tveimur leikjunum og svo eru hinir allt í lagi. Það er hluti af því að koma til baka, komast í leikæfingu. Maður er þreyttari á ákveðnum tímapunktum í leikjunum, það var mikilvægt að nýta fríið í að ná þessu úr sér.“

,,Þetta var aldrei þannig að það myndi ógna HM, það var pirrandi að fá önnur meiðsli. Ég vildi ná nokkrum leikjunum undir lok tímabilsins, fannst það mjög mikilvægt. Að koma hingað inn í leikæfingu, það var eina sem ég var hræddur við. Maður verður að spila úr því sem komið er.“

Búast má við að Alfreð spili mikilvægt hlutverk á HM en á Evrópumótinu í Frakklandi var hann alltaf á meðal varamanna í byrjun.

,,Ég kem með sama hugarfar alltaf, fyrir EM var það sama. Gera mitt á æfingum og í leikjum og undirbý eins og ég sé að fara að spila, það er sama staða. Ég fann fyrir miklu meira trausti eftir að Heimir og Helgi tók við þessu, ég sé enga ástæðu til annars en að vera mjög bjartsýnn hvað það varðar.“

Viðtalið er í heild hér að neðan.