Albert Guðmundsson er mættur til landsins á æfingar hjá íslenska landsliðinu en liðið hefur undirbúning fyrir HM.

Albert mun klæðast treyju númer fjögur á HM í sumar en hann segist ekki hafa ráðið því sjálfur.

,,Það er eitthvað sem ég hef ekkert um að segja. Ég fékk ekkert um það ráðið og þú verður bara að spyrja Sigga Dúllu að því,“ sagði Albert.

,,Ég sé hvort sem er ekki númerið sem ég er með á vellinum þannig ég einbeiti mér bara að því að spila fótbolta.“

,,Ég horfði á þetta þannig að ég hefði séð mig fyrir mér að vera valinn bara út af því til að vera klár þegar kallið kæmi í staðinn fyrir að þetta væri ekki að fara að gerast.“

,,Tíminn mun leiða í ljós hvað hlutverk mitt verður. Við byrjum á æfingu núna og leikmenn týnast inn með tímanum. Ég mun gera mitt besta til að hjálpa liðinu.“

,,Við eigum möguleika í öllum leikjunum að stela stigum eða stigi. Við erum komnir á þann standard að við förum í hvern einasta leik til að vinna, hvort sem það er Argentína eða Nígería.“

Albert fékk ekki margar mínútur með PSV á tímabilinu og vonast eftir stærra hlutverki á næstu leiktíð.

,,Ég hefði viljað fleiri mínútur á tímabilinu og ég þarf að setjast niður með PSV og ræða hvað hlutverk mitt verður á næsta tímabili.“

,,Ef þeir treysta mér ekki fyrir stærra hlutverki þá þarf ég kannski að leita eitthvað annað.“