Liverpool tók á móti Roma í fyrri leik liðanna í undanúrslitum Meistaradeildarinnar í fyrrdag en leiknum lauk með 5-2 sigri heimamanna. Það var Mohamed Salah sem kom Liverpool yfir á 36. mínútu með stórglæsilegu marki og hann bætti svo við öðru marki sínu á 45. mínútu þegar hann slapp einn í gegn og kláraði laglega framhjá Allison í marki gestanna.
Sadio Mane kom Liverpool svo í 3-0 í upphafi síðari hálfleiks áður en Roberto Firmino bætti við tveimur mörkum til viðbótar með stuttu millibili og staðan allt í einu orðin 5-0 fyrir Liverpool. Edin Dzeko minnkaði muninn fyrir Roma á 81. mínútu eftir slakan varnarleik Dejan Lovren og Diego Perotti bætti svo öðru marki við þegar hann skoraði af miklu öryggi úr vítaspyrnu á 85. mínútu.
Lokatölur því 5-2 fyrir Liverpool sem er í ágætis málum fyrir síðari leik liðanna sem fer fram í Róm eftir rúma viku en það voru ljót atvik sem áttu sér stað fyrir leik.
Stuðningsmenn Roma fóru þá að ráðast á stuðningsmenn Liverpool og hafa tveir verið handteknir í málinu. Þeir eru grunaðir um tilraun til manndráps en einn stuðningsmaður Liverpool hefur verið að berjast fyrir lífi sínu.
Maðurinn heitir Sean Cox og er 53 ára gamall. Stuðningsmenn og leikmenn Liverpool eru í áfalli eftir atvikið enda á enginn sem fer á fótboltaleik að þurfa að berjast fyrir lífi sínu.
Meira:
Sjáðu myndbandið – Tveir handteknir vegna tilraunar til manndráps