Roy Hodgson, stjóri Crystal Palace er ekki hrifinn af því að fólk tali um Wilfried Zaha sem leikara.

Zaha hefur verið magnaður fyrir Crystal Palace á þessari leiktíð og á stóran þátt í því að liðið er ekki í fallsæti.

Hann hefur skorað 7 mörk og lagt upp önnur 2 í ensku úrvalsdeildinni á þessari leiktíð en hann er stundum gagnrýndur fyrir að fara of auðveldlega niður.

„Það er enginn vafi á því í mínum huga að hann er heiðarlegur leikmaður sem vill bara skora og gera vel fyrir liðið sitt,“ sagði Hodgson.

„Hann er frábær með boltann, hugrakkur og þorir að taka menn á. Hann leitar oft á svæði þar sem er mikið sparkað í hann en hann er samt alltaf óhræddur.“

„Þegar að þú ert þannig leikmaður, sem leitar í hættulegustu svæðin þá gerist það oft að menn taka harðar á þér og þess vegna fer hann niður, ekki vegna þess að hann er að reyna fiska eitthvað,“ sagði stjórinn að lokum.