Kópavogsbær hefur samþykkt að lagt verði gervigras á Kópavogsvöll á næsta ári, þetta var samþykkt í dag.
Framlögð tillaga um gervigras á Kópavogsvöll, uppbyggingu keppnis- og æfingasvæðis fyrir frjálsrar íþróttir og endurnýjun gervigrass á Fagralundi var samþykkt með fimm atkvæðum.
Einnig verður sett upp nýtt gervigras í Fagralundi á svæði sem Breiðablik notar í dag.
,,Fyrir liggur ítarleg kostnaðaráætlun tveggja verkfræðistofa þar sem farið er yfir alla verkþætti við framkvæmdir við Smárann og Fagralund þar sem ólíkir valkostir voru bornir saman. Jafnframt er ljóst að í fjárhagsáætlun þessa árs er gert ráð fyrir viðhaldsframkvæmdum á gervigrasvelli við Fagralund. Samþykkt bæjarráðs byggir á þessari vinnu og ljóst að framkvæmdir næsta árs þarf að taka inn í fjárhagsáætlun fyrir árið 2019,“ segir í bókun meirihlutans.
Völlum með gervigras fjölgar því en Víkingur er einnig að fara í slíka framkvæmd og Fylkir er að setja gervigras á sinn heimavöll.
Fyrir eru Stjarnan, Valur og fleiri lið með gervigras á sínum heimavelli.