Kópavogsbær hefur samþykkt að lagt verði gervigras á Kópavogsvöll á næsta ári, þetta var samþykkt í dag.
Framlögð tillaga um gervigras á Kópavogsvöll, uppbyggingu keppnis- og æfingasvæðis fyrir frjálsrar íþróttir og endurnýjun gervigrass á Fagralundi var samþykkt með fimm atkvæðum.
Breiðablik hafði lagt upp með það að fá gervigras fyrir utan Fífuna í stað þess að vera í Fagralundi. Eftir samtal við bæinn var þetta niðurstaðan.
,,Við erum auðvitað að fá mjög miklar úrbætur á aðstöðu okkar til knattspyrnuiðukunnar, við verðum með þrjá velli fyrir okkar 1600 iðkendur. Í stað þess að vera með einn, Fagrilundur hefur verið ónothæfur,“ segir Orri Vignir Hlöðversson formaður knattspyrnudeildar Breiðabliks um málið við 433.is.
,,Niðurstaðan er ásættanleg, við lögðum upp með aðra leið, það er auðvitað ljóst. Við vildum setja gervigras við flatirnar hjá Fífunni, sú tillaga hlaut ekki hljómgrunn hjá þeim sem eiga mannvirkin, sem er Kópavogsbær.“
,,Þessi niðurstaða var kynnt okkur við og þetta eru tvær leiðir að sama markmiði. Við vorum með í ráðum.“
Kópavogsbær gerir sér grein fyrir því að skipta þarf út grasi á Kópavogsvelli reglulega verði völlurinn notaður af öllum flokkum, allan ársins hring. ,,Það eru miklu hærri kröfur þegar þetta er keppnisvöllur, bæði varðandi lýsingu og annað. Menn eru meðvitaðir um það, endinginn á keppnisgrasi er minni ef æfingaálagið er 100 prósent,“ sagði Orri.
