Mohamed Salah, sóknarmaður Liverpool hefur verið magnaður síðan hann kom til félagsins frá Roma, síðasta sumar.

Hann var á skotskónum í gær þegar Liverpool vann 5-2 sigur á liði Roma í undanúrslitum Meistaradeildarinnar og þá lagði hann einnig upp tvö mörk í leiknum.

Salah er nú kominn með 43 mörk í 47 leikjum á þessari leiktíð sem er ótrúleg tölfræði en hann spilar sem kantmaður og því er afrekið ennþá stærra.

Spænskir fjölmiðlar hrósuðu leikmanninum í hástert í morgun og sögðu hann vera leikmanninn sem vantar í spænsku úrvalsdeildina.

Bæði AS og Marca gáfu honum hæstu einkunn fyrir frammistöðu sína í leiknum gegn Roma en Salah hefur verið orðaður við Real Madrid á þessari leiktíð.

Liverpool keypti hann af Roma fyrir rúmlega 36 milljónir punda, síðasta sumar en leikmaðurinn hefur hækkað talsvert í verði síðan þá.

Enska félagið hefur hins vegar engan áhuga á því að selja leikmanninn en Liverpool ætlar sér að berjast um sigur í ensku úrvalsdeildinni á næstu leiktíð.