Liverpool tók á móti Roma í fyrri leik liðanna í undanúrslitum Meistaradeildarinnar í gær en leiknum lauk með 5-2 sigri heimamanna. Það var Mohamed Salah sem kom Liverpool yfir á 36. mínútu með stórglæsilegu marki og hann bætti svo við öðru marki sínu á 45. mínútu þegar hann slapp einn í gegn og kláraði laglega framhjá Allison í marki gestanna.

Sadio Mane kom Liverpool svo í 3-0 í upphafi síðari hálfleiks áður en Roberto Firmino bætti við tveimur mörkum til viðbótar með stuttu millibili og staðan allt í einu orðin 5-0 fyrir Liverpool. Edin Dzeko minnkaði muninn fyrir Roma á 81. mínútu eftir slakan varnarleik Dejan Lovren og Diego Perotti bætti svo öðru marki við þegar hann skoraði af miklu öryggi úr vítaspyrnu á 85. mínútu.

Lokatölur því 5-2 fyrir Liverpool sem er í ágætis málum fyrir síðari leik liðanna sem fer fram í Róm eftir rúma viku en það voru ljót atvik sem áttu sér stað fyrir leik.

Stuðningsmenn Roma fóru þá að ráðast á stuðningsmenn Liverpool og hafa tveir verið handteknir í málinu. Þeir eru grunaðir um tilraun til manndráps en einn stuðningsmaður Liverpool hefur verið að berjast fyrir lífi sínu.

Meira:
Sjáðu myndbandið – Tveir handteknir vegna tilraunar til manndráps

Einn mætti með hamar á svæðið og aðrir notuðu belti til að meiða stuðningsmenn Liverpool. Mynd af hamrinum er hér að neðan.