Liverpool tók á móti Roma í fyrri leik liðanna í undanúrslitum Meistaradeildarinnar í kvöld en leiknum lauk með 5-2 sigri heimamanna.
Það voru þeir Mohamed Salah, Sadio Mane og Roberto Firmino sem skoruðu mörk heimamanna í kvöld en Edin Dzeko og Diego Perotti skoruðu mörkin fyrir Rómverja.
Alex Oxlade-Chamberlain var í byrjunariði Liverpool í kvöld en hann meiddist illa á 18. mínútu og er óttast að leikmaðurinn sé með slitin krossbönd.
„Þetta eru að öllum líkindum mjög alvarleg meiðsli hjá Chamberlain,“ sagði Klopp þegar að hann var spurður út í meiðslin.
„Þetta eru gríðarlega slæmar fréttir fyrir okkur. Við erum ekki með stóran hóp í augnablikinu og við þurfum að kafa djúpt núna,“ sagði stjórinn að lokum.