Liverpool tók á móti Roma í fyrri leik liðanna í undanúrslitum Meistaradeildarinnar í kvöld en leiknum lauk með 5-2 sigri heimamanna.
Það voru þeir Mohamed Salah, Sadio Mane og Roberto Firmino sem skoruðu mörk heimamanna í kvöld en Edin Dzeko og Diego Perotti skoruðu mörkin fyrir Rómverja.
Jordan Henderson, fyrirliði Liverpool var gríðarlega svekktur með að fá á sig tvö mörk á lokamínútunum.
„Við stjórnuðum þessum leik frá A til Ö og þess vegna er gríðarlega svekkjandi að hafa gefið þeim tvö mörk á silfurfati,“ sagði fyrirliðinn.
„Þú getur ekki leyft þér að gera svona mistök í Meistaradeildinni. Að sama skapi spiluðum við mjög vel og við förum til Ítalíu með þriggja marka forskot.“
„Við verðum að vera jákvæðir, við vissum það fyrirfram að þetta yrði erfitt. Þetta verður erfitt í Róm en ég tel okkur geta klárað þetta og farið áfram í úrslitaleikinn,“ sagði hann að lokum.