Ernesto Valverde, stjóri Barcelona íhugar nú að hætta með félagið en frá þessu greina spænskir fjölmiðlar.

Valverde tók við liðinu síðasta sumar og Luis Enrique og er á góðri leið með að vinna tvennuna á sínu fyrsta tímabili með liðið.

Barcelona vann Sevilla 5-0 um helgina í úrslitum spænska Konungsbikarsins og þá er fátt sem getur komið í veg fyrir það að liðið vinni spænsku deildina í ár.

Félagið féll hins vegar úr leik í 8-liða úrslitum Meistaradeildarinnar á dögunum eftir tap gegn Roma frá Ítalíu.

Samkvæmt miðlum á Spáni voru forráðamenn félagsins afar ósáttir með úrslitin gegn Roma og vildu sumir fjölmiðlar á Spáni meina að Valverde yrði rekinn ef félagið inni ekki Konungsbikarinn.

Valverde er sagður ósáttur með þennan fréttaflutning, sem og lítinn stuðning frá stjórnarmönnum félagsins, þrátt fyrir að vera vinna gott starf innan klúbbsins.

Hann er nú sagður íhuga framtíð sína en þeir Pep Guardiola og Luis Enrique hafa báðir sagt að það sé ekki tekið út með sældinni að stýra þessu sögufræga félagi og að álagið þar sé mikið.