Manchester City tók á móti Swansea í ensku úrvalsdeildinni í dag en leiknum lauk með 5-0 sigri heimamanna.

David Silva og Raheem Sterling skoruðu sittmarkið hvor fyrir City í fyrri hálfleik og staðan því 2-0 í leikhléi.

Þeir Kevin de Bruyne, Bernardo Silva og Gabriel Jesus bættu svo við mörkum í síðari hálfleik og lokatölur því 5-0 fyrir City.

Pep Guardiola, stjóri City var að vonum afar sáttur með spilamennsku sinna manna í dag.

„Það var gaman að koma á völlinn og stíga út úr rútunni, stuðningsmennirnir voru frábærir en það sem mestu máli skiptir var leikurinn og við spiluðum vel,“ sagði stjórinn.

„Við erum alltaf að reyna bæta okkur og við sýndum það í dag. Við erum meistarar en við slökuðum ekki á í dag heldur stigum á bensíngjöfina. Ég ræddi þetta við leikmennina í vikunni og þeir voru sammála mér.“

„Þegar að þeir voru með boltann pressuðum við þá mjög vel og þegar að við vorum með hann létum við hann ganga hratt á milli þangað til að við fundum opnanir. Swansea hefur náð í góð úrslit gegn stórum liðum og þess vegna var mikilvægt að halda haus og einbeitingu allan tímann,“ sagði stjórinn að lokum.