Fjöldi leikja fór fram í ensku Championship deildinni í dag og var þeim að ljúka núna rétt í þessu.

Aston Villa vann stórsigur á Ipswich Town þar sem að Lewis Grabban skoraði tvennu í öruggum 4-0 sigri.

Birkir Bjarnason var í byrjunarliði Villa í dag og spilaði allan leikinn á miðri miðjunni en hann lagði upp fjórða og síðasta mark leiksins.

Þá var Jón Daði Böðvarsson í byrjunarliði Reading sem tapaði 0-3 fyrir Sheffield Wednesday en Íslendingnum var skipt af velli á 80. mínútu fyrir Omar Richards.

Bristol City gerði svo ótrúlegt 5-5 jafntefli gegn Hull City en Hörður Björgvin Magnússon var ekki með liðinu í dag vegna meiðsla.

Aston Villa er í fjórða sæti deildarinnar með 82 stig, þremur stigum minna en Fulham sem er í öðru sætinu.

Bristol er komið niður í tíunda sæti deildarinnar með 66 stig og er nú remur stigum frá umspilssæti.

Reading er svo í nítjánda sæti deildarinnar með 43 stig, fimm stigum frá fallsæti.