Michy Batshuayi, framherji Chelsea hefur ekki átt fast sæti í liðinu síðan hann kom til félagsins frá Marseille árið 2016.
Hann var lánaður til Borussia Dortmund í janúarglugganum þar sem hann hefur slegið í gegn og skorað 7 mörk í 10 leikjum og lagt upp eitt.
Þýska félagið vill kaupa leikmanninn í sumar en félagið seldi Pierre-Emerick Aubameyang til Arsenal í janúarglugganum fyrir rúmlega 60 milljónir punda.
Chelsea vill hins vegar fá 50 milljónir punda fyrir framherjann samkvæmt enskum fjölmiðlum en forráðamönnum Dortmund finnst það ansi hátt.
Chelsea borgaði Marseille 35 milljónir punda fyrir leikmanninn á sínum tíma en eins og áður sagði hefur hann ekki átt fast sæti í liði Chelsea, undanfarin ár.