Henrikh Mkhitaryan, sóknarmaður Arsenal gæti náð fyrri leik liðsins gegn Atletico Madrid í undanúrslitum Evrópudeildarinnar.
Armeninn meiddist á hné í fyrri leik Arsenal og CSKA Moscow í Evrópudeildinni á dögunum og hefur verið frá síðan.
Endurhæfing hans gengur hins vegar vel og nú gæti hann verið klár þegar liðin mætast þann 26. apríl næstkomandi.
Arsenal hefur ekki gengið vel í ensku úrvalsdeildinni á þessari leiktíð og situr sem stendur í sjötta sæti deildarinnar með 54 stig og er 14 stigum frá Meistaradeildarsæti.
Eini möguleiki liðsins, til þess að spila í Meistaradeildinni á næstu leiktíð er því að vinna Evrópudeildina og slá Atletico Madrid úr leik.