Marcos Alonso, bakvörður Chelsea hefur verið dæmdur í þriggja leikja bann af enska knattspyrnusambandinu en þetta var tilkynnt í morgun.
Leikmaðurinn traðkaði illa á Shane Long, framherja Southampton í leik liðanna í ensku úrvalsdeildinni um síðustu helgi.
Dómari leiksins sá ekki atvikið en enska knattspyrnusambandið ákvað að taka það fyrir í vikunni og hefur nú dæmt leikmanninn í þriggja leikja bann eins og áður sagði.
Alonso hefur verið fastamaður í liði Chelsea á þessari leiktíð og er þetta því mikið áfall fyrir liðið á lokasprettinum á tímabilinu.
Hann mun missa af undanúrslitaleik enska FA-bikarsins gegn Southampton um helgina og þá mun hann einnig missa af leikjunum gegn Burnley og Swansea í ensku úrvalsdeildinni.