Fyrstu heimileikir Fylkis í Pepsi deild karla munu fara fram í Egilshöll. Ástæðan er sú að verið er að leggja gervigras á heimavöll félagsins.
Fylkir mun hið minnsta leika við KA, ÍBV og Keflavík í Egilshöll en liðið hefur skipt á heimaleikjum við FH.
Kvennaliðið mun leika sína leiki í 1. deildinni á gervigrasinu sem fyrir er á svæði Fylkis.
Fylkir eru nýliðar í Pepsi deildinni eftir stutt stopp í næst efstu deild.
Af Facebook síðu Fylkis.
Kæra stuðningsfólk Fylkis
Framundan eru viðburðaríkar vikur í fótboltanum. Nú styttist í að fyrstu leikir í Íslandsmótinu hefjist hjá bæði meistaraflokki kvenna og karla. Eins og margir hafa tekið eftir hafa framkvæmdir við nýtt gervigras á aðalvöll Fylkis hafist og því spennandi tímar framundan hvað varðar aðstöðumál knattspyrnudeildar. Auk þessa hafa framkvæmdir við stúkuna okkar verið í gangi í vetur og ljóst að allt önnur og betri aðstaða mun bíða okkar í sumar.
Nú þegar hafa verið opnuð verðtilboð í undirvinnu og lögn gervigrass á völlinn og þegar þessi orð eru skrifuð hefur verið skrifað undir samning við Bjössa ehf. varðandi alla undirvinnu fyrir lögn gervigrassins auk þess sem yfirferð á tilboðum í gervigrasið er á lokametrunum.
Áætlað er að undirvinna fyrir graslögn taki nokkrar vikur og að henni ljúki fyrir 5. júní. Þá tekur við lögn gervigrass á völlinn. Sú vinna er að einhverju leyti háð veðri en áætlað er að þeirri vinnu ljúki í síðasta lagi í lok júní. Það er því ljóst að fyrstu heimaleikir félagsins verða ekki spilaðir á aðalvelli félagsins.
Áætlað er að fyrsti leikur meistaraflokks kvenna á nýju gervigrasi verði föstudaginn 13. júlí, en fram að því munu stelpurnar okkar spila heimaleiki sína á núverandi gervigrasvelli félagsins. En það er heimilt þar sem stelpurnar munu spila í Inkasso-deildinni í sumar.
Fyrsti leikur meistaraflokk karla á nýju gervigrasi er áætlaður laugardaginn 7. júlí, en fram að því munu heimaleikir strákanna okkar fara fram í Egilshöll. Þá hafa FHingar einnig samþykkt að víxla á heimaleikjum þannig að heimaleikur við FH spilast í seinni umferð á aðalvellinum.
Við viljum hvetja alla stuðningsmenn Fylkis að standa þétt við bakið á liðunum okkar og mæta á leiki félagsins, bæði á heimavelli sem og aðra leiki. Stuðningur okkar allra er liðunum mikilvægur.