,,Hann er mjög öflugur senter, sýndi það í fyrra,“ sagði Ólafur Kristjánsson þjálfari FH í Akraborginni þegar hann var spurður um Geoffrey Castillion sem kom til félagsins frá Víkingi.
Castillion hefur verið ískaldur upp við markið í vetur og ekki verið líkur því sem hann sýndi með Víkingi síðasta sumar.
Ólafur hefur hins vegar mikla trú á því að hann muni springa út nú þegar Pepsi deildin fer að hefjast.
,,Hann hefur ekki verið á skotskónum í vetur, ég heyrði einhverja segja að hann hefði ekki verið burðugur á undirbúningstímabilinu í fyrra. Ef ég kíki á það sem hann er að gera á æfingum og í leikjunum, ef ég gæti séð það að hann væri húðlatur og myndi ekki falla inn í strúkturinn þá hefði ég verulegar áhyggjur. Ef grunnurinn er í lagi, þá þurfum við að þjálfarar og leikmenn að hjálpa honum að komast í stöður til að skora mörk. Það hefur ekki gengið vel.“
Ólafur segir að eftir samtal við Castillion í vetur hafi þeir komist að því að þurrt gervigras væri kannski ekki hans uppáhald.
,,Hann spilaði tvo leiki með okkur á Spáni í lok febrúar og byrjun mars, þar var allt annað að sjá hann en hérna inni í höllunum. Það var tilefni til þess að taka smá spjall hvernig þurrt gervigras legðist í hann, það var samdóma álit að það væri eitthvað sem hentaði honum ekki. Ég hef vonir um það að þegar við förum út á vott gras að boltinn falli betur fyrir hann. Hann hefur verið í fínu lagi, við eigum frábært back up í Atla Viðari.“
Viðtalið við Ólaf er í heild hér að neðan.