Bakvörðurinn öflugi, Jonathan Hendrickx, hefur skrifað undir nýjan þriggja ára samning við Breiðablik nú einungis nokkrum mánuðum eftir að hann gekk til liðs við félagið.
Hendrickx hefur farið víða á ferli sínum en árið 2012 fór hann frá belgíska liðinu Standard Liège til hollenska 1. deildarliðsins Fortuna Sittard þar sem hann lék til ársins 2014.
Þaðan lá leiðin til FH þar sem hann var lykilmaður í meistaraliði félagsins árin 2015 og 2016, en árið 2017 var Hendrickx svo seldur til portúgalska liðsins Leixões.
Hendricks gekk til liðs við Breiðablik í nóvember síðastliðinn.
Athygli vekur að Blikar semja aftur við Hendrickx án þess að hann hafi tekið þátt í mótsleik fyrir félagið.