Paul Ince, fyrrum leikmaður Manchester United, hefur nefnt tvo sem gætu tekið við á Old Trafford eftir brottrekstur Jose Mourinho.
Mourinho var rekinn frá United í dag og er félagið nú að leita að nýjum knattspyrnustjóra.
Ince nefnir þá Steve Bruce og Mark Hughes en þeir eru atvinnulausir og eru báðir fyrrum leikmenn félagsins.
Bruce var síðast hjá Aston Villa en var rekinn þaðan, Hughes var þá rekinn frá Southampton fyrr í þessum mánuði.
,,Það eru tveir fyrrum leikmenn United sem eru án félags og gætu tekið við strax. Mark Hughes og Steve Bruce,“ sagði Ince.
,,Þeir hafa unnið hjá stærstu félögunum og þekkja Manchester United út í gegn. Þeir voru þarna þegar sigurganga Sir Alex Ferguson hófst.“
,,Ef þeir kæmu inn og gerðu vel, breyttu leikstílnum og fengu fólk til þess að brosa, þá myndi allt breytast.“
,,Ole Gunnar Solskjær, hann lenti í basli með Cardiff. Það gæti verið hentugt fyrir stuðningsmennina en þessir tveir eru með reynsluna og ég myndi horfa til þeirra.“