Ole Gunnar Solskjær, fyrrum leikmaður Manchester United, er orðaður við endurkomu til félagsins.
Talað er um að Solskjær gæti tekið við keflinu á Old Trafford eftir að Jose Mourinho var rekinn í dag.
Solskjær þjálfar lið Molde í Noregi í dag en hann stoppaði áður stutt í Wales og tók við Cardiff City.
Hann þekkir þó eina stærstu stjörnu United vel, Paul Pogba, en þeir unnu saman hjá varaliði félagsins.
Pogba náði ekki vel saman við Mourinho en Solskjær þekkir miðjumanninn vel og hafði þetta að segja fyrir tímabilið:
,,Ég myndi klárlega byggja liðið í kringum hann, engin spurning. Hann spilaði með David Gray og Etzaz Hussain, sem spilar fyrir mig á morgun,“ sagði Solskjær.
,,Það sýnir hversu langt þessi strákur er kominn. Paul er frábær strákur og vonandi getum við byggt liðið í kringum hann og haldið honum.“