Liverpool endurheimti toppsætið í ensku úrvalsdeildinni í gær er liðið fékk Manchester United í heimsókn. Leikurinn á Anfield var mjög fjörugur en fyrsta mark leiksins skoraði Sadio Mane fyrir heimamenn eftir góða sendingu Fabinho.

United tókst þó að jafna fyrir lok fyrri hálfleiks er Jesse Lingard kom boltanum í netið eftir mistök Alisson Becker í marki Liverpool. Í síðari hálfleik kom Xherdan Shaqiri við sögu hjá Liverpool og átti hann eftir að breyta leiknum.

Shaqiri skoraði tvö mörk með stuttu millibili og náði að tryggja Liverpool 3-1 sigur á erkifjendum sínum. Bæði skot Shaqiri fóru af leikmanni United og í netið en útlit er fyrir að hann fái bæði mörkin skráð á sig.

United liðið hleypur ekki jafn mikið og bestu liðin og Mourinho á útskýringu á því.

,,Við erum í miklum vandræðum með líkamlega hlutann,“ sagði Mourinho.

,Við erum með marga leikmenn sem eru mikið meiddir, þeir eru alltaf meiddir og það er ekki hjá mér, þetta byrjaði á undan.“

Það var þá sem Mourinho ákvað að reyna að kenna Louis Van Gaal og David Moyes um stöðuna.

,,Ef þú skoðar tölfræði Van Gaal og Moyes, þá voru leikmenn meiddir og þegar þú ert mikið meiddur, þá er erfitt að byggja upp styrk og þol.“