Liverpool endurheimti toppsætið í ensku úrvalsdeildinni í gær er liðið fékk Manchester United í heimsókn. Leikurinn á Anfield var mjög fjörugur en fyrsta mark leiksins skoraði Sadio Mane fyrir heimamenn eftir góða sendingu Fabinho.
United tókst þó að jafna fyrir lok fyrri hálfleiks er Jesse Lingard kom boltanum í netið eftir mistök Alisson Becker í marki Liverpool. Í síðari hálfleik kom Xherdan Shaqiri við sögu hjá Liverpool og átti hann eftir að breyta leiknum.
Shaqiri skoraði tvö mörk með stuttu millibili og náði að tryggja Liverpool 3-1 sigur á erkifjendum sínum. Bæði skot Shaqiri fóru af leikmanni United og í netið en útlit er fyrir að hann fái bæði mörkin skráð á sig.
,,Þeir eru alvöru núna,“ sagði Graeme Souness sérfræðingur Sky Sports um stöðu mála hjá Liverpool.
Liverpool situr á toppnum og þrátt yrir að liðið hafi ekki enn unnið titil undir stjórn Jurgen Klopp er mikil bjartsýni.
,,Það er erfitt að horfa á þetta lið í dag og halda því fram að það sé einhver veikleiki í liðinu.“
,,Klopp myndi vilja smá meiri sköpunargáfu í fremstu línu, en þrír fremstu eru vinnuhestar.“
,,Markvörðurinn er alvöru, varnarnlínan líka, það gæti verið tíu ára sigurganga að koma.“