Ovie Ejaria var í gær sendur heim til Liverpool en hann hafði spilað með Rangers á láni.
Steven Gerrard fékk Ejaria til skoska félagsins í sumar og spilaði hann alls 28 leiki fyrir félagið í öllum keppnum.
Þrátt fyrir það var þessi 21 árs gamli leikmaður ekki upp á sitt besta og hefur nú snúið aftur heim.
Gerrard tjáði sig um leikmanninn á fimmtudaginn áður en ákveðið var að senda hann til baka.
,,Ovie er mjög hljóðlátur strákur. Hann gefur þér ekki mikið svo við reyndum að ná til hans,“ sagði Gerrard.
,,Það er smá órói í kringum hann eins og staðan er en ég ræddi við hann fyrir tveimur dögum.“
,,Við ákváðum að það væri best að skilja hann eftir heima og svo ræðum við saman á föstudaginn.“