Charlton tókst að vinna mikilvægan leik í ensku þriðju deildinni í dag er liðið mætti AFC Wimbledon.
Charlton er að berjast við topp deildarinnar og stefnir að því að komast upp í Championship á nýjan leik.
Wimbledon hefur verið í miklu basli á leiktíðinni og situr í neðsta sæti deildarinnar, sex stigum frá öruggu sæti.
Naby Sarr, leikmaður Charlton, mætti grimmur til leiks í dag og fékk rautt spjald eftir aðeins 39 sekúndur.
Sarr ákvað að fara í groddaralega tæklingu í upphafi leiks og var dómarinn Trevor Kettle ekki lengi að lyfta upp rauða spjaldinu.
Charlton tókst þó að vinna leikinn 2-0 að lokum en Wimbledon missti einnig mann af velli á 33. mínútu leiksins.