Paul Merson er kannski fyrrum leikmaður Arsenal en hann er ekki vinsæll á meðal stuðningsmanna félagsins.

Merson á það til að gagnrýna leikmenn Arsenal mikið og hefur nú tjáð sig um miðjumanninn Lucas Torreira.

Torreira hefur fengið lof fyrir sína frammistöðu en hann kom til félagsins frá Sampdoria í sumar.

Merson segir að Arsenal hafi þurft á djúpum miðjumanni að halda en telur þó að hann sé ekki leikmaður í topp klassa.

,,Liverpool myndi ekki kaupa hann á morgun. Ég held að ekkert topplið hafi viljað hann,“ sagði Merson.

,,Hann getur orðið betri og verður betri en hann hefur verið frábær. Þeir þurftu á honum að halda.“

,,Við vissum það öll, Arsene Wenger vissi það líka en hann var of þrjóskur til að kaupa einhvern.“

,,Hann gæti verið að spila fyrir Southampton og hann yrði ekki nefndur eða Burnley. Enginn myndi nefna hann, Arsenal þurfti bara svo mikið á þessu að halda.“