Liverpool er komið í 16-liða úrslit Meistaradeildarinnar eftir leik gegn Napoli á Anfield í gær.

Það var boðið upp á skemmtilegan leik í Liverpool en aðeins eitt mark var skorað og það gerði Mohamed Salah.

Salah skoraði eina mark leiksins fyrir Liverpool í fyrri hálfleik og fer liðið áfram ásamt Paris Saint-Germain sem er í efsta sæti riðilsins. PSG vann Red Star á sama tíma 4-1.

Áður en Salah skoraði þá fékk Virgil van Dijk að líta gult spjald fyrir að brjóta á sóknarmanninum Dries Mertens.

Margir segja að Van Dijk hafi átt að fá beint rautt spjald en hann fór nokkuð illa í Belgann sem lá sárþjáður eftir á vellinum.

,,Myndbandið segir rautt spjald, það er alltaf verið að ræða um VAR og þar hefði þetta verið rautt. Þegar VAR kemur í Meistaradeildina þá verður það of seint,“ sagði Carlo Ancelotti, stjóri Napoli eftir leik.