Chelsea hefur sett fjóra stuðningsmenn félagsins í tímabundið bann á meðan rannsókn fer fram.

Nokkrir stuðningsmenn eru ásakaðir um að hafa verið með kynþáttarfordóma í garð Raheem Sterling á laugardag.

Manchester City mætti þá Chelsea í ensku úrvalsdeildinni en heimamenn höfðu betur með tveimur mörkum gegn engu.

Einn stuðningsmaður náðist á upptöku en hann lét ljót ummæli falla er Sterling var nokkrum metrum frá.

Chelsea hefur staðfest það að fjórir hafi nú verið settir í bann á meðan lögreglan rannsakar atvikið.

Þeir sem eru fundnir sekir verða settir í lífstíðarbann og mega aldrei mæta á leiki félagsins aftur.