Það voru mikil læti í gær þegar Brighton og Crystal Palace áttust við í ensku úrvalsdeildinni.

Slagsmál brutust út fyrir leikinn í gær og var erfitt að hafa stjórn á stuðningsmönnum í stúkunni yfir leiknum.

Alls voru tíu stuðningsmenn handteknir en Brighton vann leikinn að lokum 3-1 á heimavelli.

Einn 21 árs gamall stuðningsmaður Brighton var handtekinn fyrir það að kasta köku í átt að Wilfried Zaha, leikmanns Palace.

Zaha er ekki vinsæll á Amex vellninum eftir að hafa skorað tvisvar árið 2013 í umspilsleik um að komast upp í efstu deild.

Zaha skoraði einnig tvö mörk í sigri á Brighton á síðustu leiktíð og fékk mikið áreiti í viðureign gærdagsins.

Enginn leikmaður slasaðist þó í látunum en bæði félög eiga væntanlega von á refsingu frá knattspyrnusambandinu.