Arnór Sigurðsson leikmaður CSKA Moskvu er þriðji Íslendingurinn til að skora í Meistaradeild Evrópu. Það gerði hann gegn Roma í kvöld.
Hann og Hörður Björgvin Magnússon voru báðir í byrjunarliði CSKA en Herði var vikið af velli, hann fékk tvö gul spjöld.
Mark Arnórs kom á 51 mínútu leiksin en hann kláraði færið sitt vel og jafnaði leikinn, 1-1.
Fimm mínútum síðar var Hörður Björgvin rekinn af velli, hann fékk sitt annað gula spjald og var sendur í sturtu.
Þessi mistök Harðar nýttu gestirnir í Roma sér því þremur mínútum síðar skoraði Edin Dzeko fyrir Roma og tryggði sigur. Roma er á toppi riðilsins með níu stig en CSKA hefur fjögur í þriðja sæti.
Í hinum leik kvöldsins vann Valencia 3-1 sigur á Young Boys og er liðið komið upp í annað sæti riðilsins, fyrir ofan Manchester United sem heimsækir Juventus í kvöld.
