Hans-Peter Briegel, fyrrum varnarmaður Þýskalands, kennir Pep Guardiola um slæmt gengi landsliðsins undanfarið.
Þýskaland átti hörmulegt HM í sumar og datt úr leik í riðlakeppninni. Liðið endaði einnig í neðsta sætinu í sínum riðli í Þjóðadeildinni.
Guardiola var stjóri Bayern Munchen frá 2013 til 2016 en lið hans eru ávallt mikið með boltann og vilja hafa stjórn á því sem gerist í leikjum.
Briegel telur að þessi hugmyndafræði hafi haft slæm áhrif á landsliðið sem varð heimsmeistari árið 2014.
,,Lykilatriðið sem við höfum gleymt er það að úrslitin skipta meira máli en að stjórna leiknum,“ sagði Briegel.
,,Síðan Guardiola tók við Bayern þá hefur eitthvað breyst. Þær ranghugmyndir að þú þarft að vera 75 prósent með boltann til að vinna leiki.
,,Það er ekki nóg að vera með boltann til að vinna, ekki alltaf. Heimsmeistarar Frakka sönnuðu það að þú getur líka unnið leiki með því að hafa minna af boltanum.“