Jurgen Klopp, stjóri Liverpool, sendi bakverðinum Andy Robertson skemmtileg skilaboð eftir að sá síðarnefndi hafði fengið fyrirliðabandið hjá Skotlandi.
Robertson var nefndur sem nýr fyrirliði Skotlands fyrr á árinu en hann hefur verið á mikilli uppleið eftir að Klopp keypti hann frá Hull.
,,Ég sendi honum skilaboð þar sem stóð: ‘Bara svo þú vitir af því þá er ég að fá fyrirliðabandið,’ sagði Robertson.
,,Þetta var bara gert í virðingarskyni því ég vildi ekki að hann myndi komast að því sjálfur.“
,,Ég sagði við hann: ‘Takk fyrir allt sem þú hefur gert, ég verð fyrirliði Skotlands. Ég vona að það gangi vel.’
,,Hann skrifaði bara til baka með stórum stöfum: Þú ert hinn eini sanni skoski Braveheart núna!’
Braveheart er kvikmynd sem kom út árið 1995 en þar leikur Mel Gibson hinn goðsagnarkennda skoska riddara, Sir William Wallace.
