Höttur og Huginn munu leika undir sama merki á næsta keppnistímabili en þetta var staðfest í kvöld.
Bæði þessi lið féllu úr 2. deild karla í sumar og munu tefla fram sameiginlegu liði í 3.deildinni næsta sumar.
Það þýðir að eitt laust pláss er í 3.deild karla fyrir næstu leiktíð og mun það fara til annað hvort Álftanesar eða Ægis.
Ægir lenti í neðsta sæti 3.deildarinnar á síðasta keppnistímabili en Álftanes það lið sem komst næst því að komast upp úr 4. deild.
Tilkynning Hugins og Hattar:
Höttur Rekstrarfélag og Knattspyrnudeild Hugins ætla að spila undir sameiginlegum merkjum í 3. deild karla næsta sumar.
Þetta er niðurstaða eftir um tveggja mánaða viðræður á milli félaganna. Stjórnir beggja félaga eru sannfærðar um að þetta sé rökrétt skref og að þarna sé verið að tryggja það að hægt sé að efla alla umgjörð í kringum knattspyrnuna.
Það hefur eflaust ekki farið fram hjá neinum að bæði lið féllu um deild síðasta sumar og stóð því til að þau bæði myndu spila í 3. deild.
Með samstarfi fæst eitt öflugt lið beggja megin Fjarðarheiðar sem hefur tækifæri til þess að bæta sig og þróast en liðið er ríkt af ungum leikmönnum í bland við nokkra eldri. Hvort þetta sé fyrirboði um að sveitarfélögin muni seinna sameinast skal látið ósagt en þau sem standa á bakvið þessa ákvöðrun eru í það minnsta öll sammála um að með samstarfi séu flestir vegir færir.
Þjálfarar liðsins Viðar Jónsson og Brynjar Árnason hafa verið upplýstir og hlynntir viðræðunum sem að loks er lokið.
Það er von félaganna að Höttur/Huginn verði jafn vel tekið og Huginn og Hetti hefur verið gert af heimamönnum undanfarna áratugi. Nú erum við öll í sama liðinu, sameinuð erum við sterkari en sundruð.
Sjáumst á vellinum næsta ári.