Gary Neville, fyrrum leikmaður Manchester United, er ekki viss um miðjumanninn Fred sem kom til félagsins í sumar.

Fred kostaði United 50 milljónir punda en hann lék áður með liði Shakhtar Donetsk í Úkraínu.

Neville segir að Fred hafi ekki hrifið sig of mikið á leiktíðinni þrátt fyrir að hafa byrjað mjög vel.

,,Fred kostaði 50 milljónir og leit vel út í fyrsta leik tímabilsins og leit út fyrir að vera snyrtilegur á velli. Spurningin er hins vegar er það sem þú býst við frá leikmanni sem kostar 50 milljónir?“ sagði Neville.

,,Er hann leikmaður sem breytir leikjum? Lítur hann út fyrir að geta varið markið þitt? Getur hann tengt spil á milli varnar og sóknar? Eins og staðan er þá er svarið nei.“

,,Hann er þó enn að venjast Manchester United og kemur inn í erfiða stöðu. Félagið er ekki mjög stabílt eins og staðan er þegar kemur að frammistöðu.“