Ousmane Dembele, leikmaður Barcelona á Spáni, er á síðasta séns hjá félaginu en þetta segja spænskir fjölmiðlar.
Hegðun Dembele hefur verið í umræðunni á árinu en hann hefur komið sér í vandræði hjá stórliðinu.
Frakkinn kom til Barcelona frá Dortmund á síðasta ári og hefur heldur ekki þótt standa undir væntingum hjá félaginu.
Í síðustu viku missti Dembele af æfingu vegna smávægilegra meiðsla en lét engan vita að hann myndi ekki mæta – síminn var batteríslaus að hans sögn.
Stjórn Barcelona tekur þessa hegðun leikmannsins ekki í mál en hann hefur áður mætt of seint á fundi og á æfingar.
Einnig hefur Dembele verið latur við að læra spænska tungumálið og á í erfiðleikum með að tjá sig.