Huddersfield Town er kannski ekki frægasta félagið á Englandi en liðið leikur þó í efstu deild í dag.

Félagið fékk til sín danska miðjumanninn Philip Billing á sínum tíma frá Esbjerg í Danmörku.

Billing kom til Huddersfield aðeins 17 ára gamall eða árið 2013. Á þeim tíma vissi hann ekki hvaða félag hafði áhuga á sér en liðið lék í Championship-deildinni.

Billing tók upp á því að kveikja á tölvunni og setti tölvuleikinn FIFA í tækið. Þannig kynntist hann sínu nýja félagi.

,,Stjúppabbi sagði við mig að það væri þetta lið, Huddersfield Town sem hefði áhuga á mér,“ sagði Billing.

,,Á þessum tíma þá hugsaði ég með mér að ég hefði aldrei heyrt um þetta félag.“

,,Ég ákvað því að fara í FIFA og sjá hvaða leikmenn þeir væru með og hvort ég þekkti einhvern.“

,,Mig minnir að ég hafi ekki þekkt neinn en ég sá að Huddersfield væri í deildinni fyrir neðan úrvalsdeildina og að það gæti ekki verið slæmur kostur.“