Zlatan Ibrahimovic, leikmaður LA Galaxy, er tilbúinn að snúa aftur til Paris Saint-Germain með einu skilyrði.
Zlatan skoraði 156 mörk fyrir PSG frá 2012 til 2016 áður en hann samdi við Manchester United á Englandi.
Hann hefur verið orðaður við sitt fyrrum félag sem er sagt vilja fá hann á láni í janúarglugganum.
Svíinn er þó ekki á leið til Parísar þessa stundina en er opinn fyrir því að setjast í stjórastólinn einn daginn.
,,Ef ég sný aftur til PSG yrði það til að gerast stjórinn. Það er ekkert annað sem myndi heilla mig. Það er það eina sem myndi fá mig til að snúa aftur,“ sagði Zlatan.
,,Það er ekkert annað í stöðunni fyrir mig. Það er þó ekki á dagskrá núna. Ég er enn að spila og vil ennþá spila. Þegar ég tek ákvörðun um hvað ég vilji gera þá læt ég heiminn vita.“