Liverpool á Englandi er til sölu en þetta fullyrðir bandaríski miðillinn New York Post í dag.
Eigandi Liverpool er bandaríski milljónamæringurinn John Henry sem á einnig hafnaboltaliðið Boston Red Sox.
Henry hefur verið eigandi Liverpool undanfarin átta ár en hann keypti félagið fyrir 477 milljónir dollara árið 2010.
Stuðningsmenn Liverpool virðast flestir vera ánægðir með störf Henry sem hefur leyft félaginu að kaupa marga góða leikmenn.
,,Félagið er til sölu ef hann getur fengið rétta upphæð,“ er haft eftir heimildarmanni NY Post.
Þrátt fyrir ágætis gengi undanfarin ár hefur vantað titlana á Anfield undir stjórn Jurgen Klopp.
Liverpool komst nálægt því að vinna Meistaradeildina á síðustu leiktíð en tapaði í úrslitum gegn Real Madrid.
