Louis van Gaal náði betri árangri með Manchester United en núverandi stjóri liðsins, Jose Mourinho.
Þetta segir Arnold Muhren, fyrrum leikmaður United en Mourinho hefur ekki þótt náð of góðum árangri á Old Trafford.
Van Gaal var rekinn svo að Mourinho gæti tekið við en sá síðarnefndi hefur unnið Evrópudeildina og deildarbikarinn eftir komuna.
,,Áður en Mourinho kom til United þá var Louis van Gaal þarna en honum gekk ekki svo vel,“ sagði Muhren.
,,Á Englandi byrja þeir alltaf strax að leita að nýjum þjálfara en eftir allt saman þá tel ég að Van Gaal hafi gert betur en Mourinho.“
,,Já, Mourinho vann deildarbikarinn en það segir ekki mikið þó að hann vilji meina að það sé stórt fyrir félagið. Það er ekki eins mikilvæg keppni og FA bikarinn.“
,,Fyrir félag eins og United þá er það ekki stórt afrek að vinna Ajax í úrslitum Evrópudeildarinnar. Það er ekki svo sérstakt, er það?“