Leicester City vann sigur í ensku úrvalsdeildinni um helgina er liðið heimsótti Cardiff í 11. umferð vetrarins.
Aðeins eitt mark var skorað í Wales en það gerði Demarai Gray fyrir gestina í síðari hálfleik. Mikil sorg ríkir hjá Leicester þessa dagana en eigandi liðsins, Vichai Srivaddhanaprabha, féll frá um síðustu helgi.
Srivaddhanaprabha var gríðarlega vinsæll hjá stuðningsmönnum og leikmönnum og þykir hafa verið mjög góður maður.
Srivaddhanaprabha eignaðist meiri hlut í Leicester fyrir átta árum og sá sína menn vinna úrvalsdeildina óvænt árið 2016.
Þyrla hans hrapaði fyrir utan heimavöll félagsins en fjórir aðrir voru um borð, allir misstu líf sitt.
Málið er áfram til rannsóknar en David Sandall var spurður um málið í dag.
,,Myndefni varpar ljósi á það að þyrlan snýst í hringi og er stjórnlaus, áður en hún féll til jarðar,“ sagði Sandall.
,,Fólkið átti aðeins minnsta möguleika að koma sér út úr þyrlunni á þeim tíma. Málið er áfram til rannsóknar til að finna út hvað gerðist.“
